पोखरा, २६ माघ
लखन बचत तथा ऋण सहकारी संस्था लिमिटेड, पोखरा–१० ले आफ्ना शेयर सदस्यका लागि एक दिने सहकारी शिक्षा तालिम सम्पन्न गरेको छ । बिहीबार आयोजित तालिममा सहकारी रजिष्ट्रारको कार्यालय, गण्डकी प्रदेशका निमित्त कार्यालय प्रमुख चोलाकान्त वाग्ले र शाखा अधिकृत महेशराज पौडेलले प्रशिक्षण दिनुभएको थियो ।
सहकारी संस्थाका अध्यक्ष पूर्णबहादुर रानामगरको अध्यक्षतामा भएको कार्यक्रममा सहभागी शेयर सदस्यहरूलाई सहकारी ऐन, कानून, नियमावली एवं सहकारी सिद्धान्तका बारेमा जानकारी गराइएको थियो । साथै, सो अवसरमा वित्तीय साक्षरतासम्बन्धी “समृद्धि” नामक वृत्तचित्र समेत प्रदर्शन गरिएको थियो । शिक्षा उपसमितिका संयोजक रूद्रबहादुर श्रीसले तालिमको सहजीकरण गर्नुभएको थियो ।