न्यूयोर्क,जुन/१९/२०२३ ।
अमेरिकाका मगर समुदायले भुमे पर्वको मौलिक सांस्कृतिक जगेर्ना तथा संरक्षण गर्न जमिनको पूजा गरी भुमे पर्व मनाएका छन् । हरेक वर्षझै यस बर्ष पनी परम्परागत रूपमा गरिँदै आइएको भुमे पूजालाई भुमे पर्व आयोजक समिति न्यूयोर्कले यस वर्ष पनि निरन्तरता दिएको हो । कार्यक्रमको शुरूवात नेपालको राष्ट्रिय गान गाएर शुरू गरिएको थियो ।
‘नेपालमा हाम्रो पुर्खाहरूले मनाउदै आएको भुमे पर्वलाई कर्मथलो अमेरिकामा पनी नयाँ आउने पिढीहरूलाई अनुसरण गर्न यस्तो कार्यक्रमले हाम्रो संस्कृतिको संरक्षण र पर्वद्धन गर्नमा मद्दत हुने‘ कुरा प्रमुख अतिथि मगर संघ अमेरिकाका अध्यक्ष कुलदिप राना मगरले बताउनु भयो ।
भुमिको पूजा गर्नाले अन्न उत्पादन बढ्ने तथा प्राकृतिक प्रकोप कम हुने विश्वास गरिन्छ । भुमीको पूजा गरेर मनाइने भएकाले यो पर्वलाइ भूमे पर्व भनिएको हो ।
यो पर्व मनाउदा मगर समुदायले परम्परागत पहिरन लाउने गरेका छन् । परम्परागत गितमा नाच्ने पनि चलन रहेकोछ । भूमे नाचमा १२ ओटा चाल रहने गरेको छ ।
परम्परागत पहिरनमा सजिएर हातमा फुलको थुङ्गा लिइ, गोलो घेरा बनाइ आकर्षक तरिकाले भूमे नाच्ने गरिन्छ । भूमे पर्वको समयमा प्रकृतीलाइ पूजा गर्नुका साथै मीठो मसिनो खाने, आफन्त भेट्ने, समुहमा नाचगान गर्ने गरिन्छ ।
